\ 

\I. kafli

1. gr.

Heiti félags, heimili og markmið

Heiti félagsins er Félag kvenna í atvinnurekstri, FKA. Heimili félagsins og varnarþing er í Reykjavík.  

2. gr.

Markmið félagsins

Markmið félagsins er að gæta hagsmuna, efla samstöðu og samstarf kvenna í atvinnurekstri.

II. kafli

3. gr.

Félagsmenn

Félagið er opið öllum þeim konum sem gegna leiðtoga- og stjórnunarstöðum í íslenskum atvinnurekstri, skrá sig í félagið og greiða félagsgjöld.

Halda skal félagaskrá yfir félagskonur. Hafi félagskona ekki greitt félagsgjald í eitt starfsár skal litið svo á að hún óski ekki lengur eftir aðild að félaginu og skal nafn hennar tekið út af félagaskrá.

4. gr.

Stjórn félagsins getur vikið félagskonu úr félaginu hafi hún brotið lög félagsins eða með öðrum hætti sýnt af sér háttsemi sem er andstæð hagsmunum félagsins.

Áður en tekin er ákvörðun um brottvísun skal gefa félagskonu kost á að tjá sig um hina fyrirhuguðu ákvörðun.

Félagskona getur krafist félagsfundar til að bera ákvörðun stjórnar um brottvikningu hennar undir fundinn.

5.gr

Tekjur félagsins

Tekjur félagsins eru árgjöld félagskvenna, ákveðin á aðalfundi, styrkir, vaxtatekjur svo og aðrar tekjur sem kunna að verða af rekstri.

III. kafli

Aðalfundir og félagsfundir

6.gr

Aðalfundur hefur æðsta vald í málefnum félagsins. Aðalfund skal halda fyrir lok júní ár hvert. Til hans skal boðað með tryggilegum hætti, t.d. bréflega eða með tölvupósti til félagskvenna með minnst fjórtán daga fyrirvara. Aðalfundur er lögmætur ef til hans er löglega boðað. Í aðalfundarboði skal auk tilkynningar um dagskrá gera grein fyrir því hvaða konur gangi úr stjórn á aðalfundinum og hvort þær gefi kost á sér til endurkjörs. Jafnframt skal hvetja félagskonur til að gefa kost á sér í laus stjórnarsæti og önnur trúnaðarstörf fyrir félagið. Rétt til setu og atkvæðis á aðalfundi eiga þær félagskonur er mættar eru á fundinn og staðið hafa skil á félagsgjaldi yfirstandandi starfsárs.

Almenna félagsfundi skal halda eftir ákvörðun stjórnar eða að kröfu tíunda hluta félagskvenna eða skoðunarmanna reikninga. Krafa um félagsfund skal gerð skriflega og fundarefni tilgreint og er stjórn þá skylt að boða til fundar innan fjórtán daga. Félagsstjórn boðar til almennra félagsfunda með minnst sjö daga fyrirvara. Félagsfundur er lögmætur ef til hans er löglega boðað. Félagsfundur kýs fundarstjóra og fundarritara, sem skráir fundargerð. Rétt til setu á félagsfundum eiga allar félagskonur. Rétt til atkvæðis á félagsfundi eiga þær félagskonur, sem mættar eru á fundinum og sem staðið hafa skil á félagsgjaldi yfirstandandi starfsárs.

Meiri hluti greiddra atkvæða ræður úrslitum mála á aðalfundi og félagsfundi, nema annars sé getið í lögum þessum.

7.gr 

Dagskrá aðalfundar skal vera sem hér segir:

1. Kosning fundarstjóra og fundarritara.
2. Skýrsla stjórnar um starfsemi félagsins og rekstur þess á liðnu starfsári.
3. Ársreikningur félagsins fyrir liðið starfsár kynntur og borinn upp til samþykktar.
4. Skýrslur starfsnefnda.
5. Lagabreytingar ef einhverjar.

6. Kosning stjórnar.

7. Kosning skoðunarmanns reikninga og eins til vara.

8. Kosning í starfsnefndir á vegum félagsins.

9. Ákvörðun félagsgjalds.
10. Önnur mál.

IV. kafli

Stjórn félagsins, starfsnenfdir og félagsdeildir

8. gr.

Stjórn félagsins skal skipuð sjö konum kjörnum á aðalfundi til tveggja ára í senn. 

Formann skal kjósa sérstaklega en aðrar stjórnarkonur skal kjósa í einu lagi og skipta þær með sér verkum. 

Stjórnarkjöri skal hagað þannið að oddatöluár skal kjósa formann og þrjár stjórnarkonur en hitt árið þrjár stjórnarkonur.  Gangi stjórnarkona úr stjórn á fyrra ári kjörtímabilsins skal kjósa nýja stjórnarkonu í hennar stað á næsta aðalfundi til eins árs.

9. gr.

Stjórn félagsins stýrir öllum málefnum félagsins milli aðalfunda og gætir hagsmuna þess á grundvelli laga þessara og ákvarðana aðalfundar og félagsfunda.

Stjórn félagsins getur ráðið framkvæmdastjóra til að sinna daglegum rekstri félagsins sem í þeim efnum skal fara eftir fyrirmælum stjórnar.

Stjórn félagsins tekur nánari ákvarðanir um starfsemi félagsins og ber ábyrgð á fjárreiðum þess. Ef framkvæmdastjóri er ráðinn skal hann annast um að bókhald félagsins sé fært í samræmi við lög og venjur og að meðferð eigna félagsins sé með tryggilegum hætti.

Stjórninni er heimilt að skuldbinda félagið fjárhagslega, enda undirriti fjórir stjórnarmenn slíkar skuldbindingar. Stjórnin veitir prókúruumboð.

Ef framkvæmdastjóri er ráðinn getur hann skuldbundið félagið í málum sem eru innan verksviðs hans samkvæmt 2. mgr. þessarar greinar.

10. gr.

Stjórnarfundi skal halda svo oft sem þurfa þykir. Formaður stjórnar boðar til funda með hæfilegum fyrirvara og aldrei skemmri en eins sólarhrings fyrirvara.

Stjórnarfundur er ályktunarfær ef meiri hluti stjórnarkvenna sækir fund. Afl atkvæða ræður úrslitum á stjórnarfundum. Nú eru atkvæði jöfn og ræður þá atkvæði formanns (varaformanns í fjarveru formanns) úrslitum. 

Gerðir stjórnarinnar skulu bókfærðar. 

11. gr.

       Starfsnefndir kosnar á aðalfundi starfa að verkefnum sem þeim eru falin í samráði við og á ábyrgð stjórnar félagsins.

11. gr. A

Stofnun félagsdeilda í FKA er heimil að fengnu samþykki stjórnar.  Beiðni um stofnun félagsdeildar skal send stjórn skriflega og skal taka beiðnina fyrir á næsta stjórnarfundi eftir að hún berst.  Eftirfarandi upplýsingar skulu fylgja beiðninni:

• Heiti félagsdeildar
• Tilgangur félagsdeildar
• Nöfn stofnfélaga
• Fyrirsvarsmenn félagsdeildar, sem skulu vera a.m.k. tveir.
• Hvernig aðild nýrra félagskvenna að félagsdeild skuli háttað

Stofnfélagar félagsdeildar skulu vera a.m.k. 15.   Einungis félagskonur í FKA geta verið félagsmenn í félagsdeild.  Halda skal félagaskrár félagsdeilda.    Félagsdeild skal halda fundi eftir því sem þurfa þykir.

Stjórn FKA er heimilt að synja umsókn félagsdeildar ef tilgangur hennar samræmist ekki tilgangi FKA.  Stjórn FKA er heimilt að leggja félagsdeild niður gerist hún eða meðlimir hennar sekir um brot á lögum félagsins eða vanrækslu á skyldum sínum.

V. kafli
Ýmis ákvæði
12. gr.

Starfsár og reikningsár félagsins er almanaksárið. Stjórnin skal hafa ársreikning endurskoðaðan af skoðunarmanni tilbúinn í tæka tíð fyrir aðalfund.

13. gr.

Lögum félagsins verður aðeins breytt á aðalfundi enda fái breytingartillagan 2/3 hluta greiddra atkvæða. Tillögur að lagabreytingum þurfa að berast stjórninni eigi síðar en 15. apríl ár hvert. Í fundarboði skal þess getið sérstaklega að tillaga til lagabreytinga verði tekin til meðferðar á fundinum og skal efni hennar lýst.

14. gr.

Nú kemur fram tillaga um það að félaginu skuli slitið og skal hún þá sæta sömu meðferð sem tillaga til lagabreytingar, sbr. 13. gr. Á þeim fundi skal þá jafnframt tekin ákvörðun um hvernig farið skuli með eignir og skuldir félagsins.

Samþykkt á aðalfundi félagsins 20. maí 2008.