FKA Norðurland

Markmið

Fjölga tækifærum fyrir konur: Skapa fleiri tækifæri fyrir konur á Norðurlandi til að taka virkan þátt í atvinnulífinu, stjórnunarstöðum og nýsköpunarverkefnum.

Auka sýnileika kvenna: Tryggja að konur á Norðurlandi séu sýnilegar og virkir þátttakendur í atvinnulífi og samfélagsumræðu, bæði á staðnum og á landsvísu.

Styrkja samfélagið: Með því að efla þátttöku kvenna á Norðurlandi í atvinnulífinu stuðlum við að sjálfbærni og vexti samfélagsins í heild, sem nýtist öllum.

Tengslanet: Styrkja tengslanet kvenna á Norðurlandi og efla samstarf við aðrar deildir FKA um allt land til að skapa sameiginlega verkefnavettvang og sameiginlega þekkingu.

Helstu verkefni

FKA Norðurland stendur fyrir fjölbreyttum viðburðum, bæði rafrænum og staðbundnum, þar sem konur hittast, ræða málin, efla tengslanetið og styrkja sig í atvinnulífinu. Óformlegir fundir eru haldnir reglulega, oft á kaffihúsum eða veitingastöðum á Akureyri, þar sem félagskonur fá tækifæri til að tengjast betur og efla samstöðu.

Af og til yfir vetrarmánuðina bjóða einstök fyrirtæki í eigu – eða undir stjórn FKA kvenna afslátt á vöru eða þjónustu til félagskvenna. Hefur það mælst vel fyrir.

FKA Norðurland tekur virkan þátt í viðburðum á landsvísu, eins og Sýnileikadegi FKA, þar sem norðlenskar konur deila sinni reynslu með félaginu.

Stjórn

Starf stjórnar FKA Norðurlands er fjölbreytt og lýtur að því að skipuleggja viðburði, stýra starfi deildarinnar og vinna að markmiðum sem efla þátttöku kvenna í atvinnulífinu. Stjórnarfundir eru haldnir reglulega, þar sem rædd eru málefni félagsins, áherslur og komandi verkefni. Tæknin hefur verið nýtt til að halda fundi þrátt fyrir dreifð búsetu stjórnarkvenna, sem gerir kleift að efla tengslanet og samstöðu meðal kvenna á svæðinu.

Stjórn FKA Norðurlands skipuleggur einnig viðburði sem styrkja tengslanet kvenna á Norðurlandi, þar á meðal opna fræðsluviðburði og tengslamyndunarkvöld.

Saga FKA Norðurlands

FKA Norðurland, deild innan FKA, var formlega stofnuð í október 2014. Áður höfðu aðeins örfáar konur á Akureyri verið í félaginu, en með stofnun Norðurlandsdeildarinnar fjölgaði konum sem tengdust FKA á svæðinu. Þetta markaði tímamót fyrir norðlenskar konur, sem fengu nýjan vettvang til að hittast, efla sig í atvinnulífinu og byggja upp öflugt tengslanet.

Deildin hefur staðið fyrir ýmsum viðburðum og verkefnum sem stuðla að fræðslu og tengslamyndun fyrir konur á Norðurlandi. Meðal stærstu viðburða sem FKA Norðurland hefur skipulagt var Landsbyggðarráðstefna FKA árið 2022, sem fór fram á Akureyri. Þar komu saman félagskonur víðsvegar af landinu til að ræða tækifæri og áskoranir kvenna í atvinnulífi á landsbyggðinni. Á ráðstefnunni fluttu framúrskarandi konur erindi um nýsköpun og tækifæri á landsbyggðinni.

Með tímanum hefur FKA Norðurland orðið mikilvægur vettvangur fyrir konur á svæðinu til að sækja fram, styrkja tengslanet sitt og taka þátt í fjölbreyttum viðburðum sem stuðla að aukinni þátttöku kvenna í atvinnulífinu.