Ávarp formanns

Jafnvægisvog FKA var sett á laggirnar árið 2018 með það skýra markmið að stuðla að auknu jafnvægi kynja í efsta lagi stjórnunar í íslensku atvinnulífi. Verkefnið var frá upphafi hugsað sem hreyfiafl – ekki lagaskylda heldur hvati – byggt á þeirri einföldu staðreynd að jafnrétti gerist ekki af sjálfu sér. Það er afleiðing meðvitaðra ákvarðana, mælinga og gagnsæis.

Í samstarfi við Creditinfo, Deloitte, Dómsmálaráðuneytið, Háskóli Íslands, Pipar\TBWA, Ríkisútvarpið og Sjóvá hefur verkefnið þróast í eitt sýnilegasta og áhrifamesta jafnréttisátak á sviði stjórnunar hér á landi. Ómetanlegt framlag forvera minna, styrktaraðila, Jafnvægisvogarráðs, verkefnastjórum og framkvæmdastjóra FKA síðustu ár er því að þakka - og síðast en ekki síst þátttakendur sem eru hið sanna hreyfiafl og vita að jafnrétti er ákvörðun.

Tölurnar tala sínu máli // Ávarp formanns

Við tölum oft um hlutfall kvenna í forystu en kannski ættum við frekar að horfa á þetta svona:

Í skráðum félögum í Kauphöllinni eru 86% forstjóra karlar.
Konur eru um þriðjungur framkvæmdastjórna þeirra.
Og 89% stjórnarformanna eru karlar.

Þetta er forystan sem mótar stóran hluta íslensks atvinnulífs í dag og það liggur fyrir að hún endurspeglar á engan hátt jafnréttissamfélagið sem við viljum búa í.

Á sama tíma sjáum við að þar sem skýrar reglur hafa verið settar hefur orðið raunveruleg breyting. Í stjórnum skráðra félaga, þar sem kynjakvótar gilda, er hlutfall kvenna komið í 43%.

Það segir okkur eitt: Umbreyting á sér stað þegar við tökum ákvörðun um það.

Staðan er ekki bundin við skráð félög. Þvert á atvinnulífið er hlutfall kvenkyns framkvæmdastjóra 24,4%. Myndin er því skýr, óháð stærð eða tegund fyrirtækja þá er forysta enn verulega einsleit meðal íslenskra fyrirtækja.

Jafnvægisvog FKA byggir á þeirri sannfæringu að jafnvægi í forystu sé ekki aðeins spurning um réttlæti, heldur forsenda betri ákvarðana, aukinnar nýsköpunar og sterkari samkeppnishæfni.

Nú eru 251 fyrirtæki skráð til þátttöku í Jafnvægisvoginni og 128 þeirra hafa hlutu Jafnvægisvogarmerkið 2025. Það sýnir að vilji til breytinga er til staðar í íslensku atvinnulífi.

En vilji einn og sér dugar ekki.

Ef við ætlum að ná raunverulegum árangri þurfum við að færa umræðuna frá hvatningu yfir í ábyrgð. Frá því að mæla stöðu yfir í að breyta henni. Frá því að tala um jafnrétti yfir í að taka ákvarðanir sem breyta stöðunni.

Verkefnið framundan er skýrt. Að gera jafnvægi í forystu að sjálfsögðum hluta af góðum stjórnarháttum. Að gera það mælanlegt, sýnilegt og óumdeilanlegt.

Því þetta snýst ekki um skort á reynslu eða hæfileikum. Því að þessir þættir eru til staðar. Það sem skiptir máli er hvernig þeim er veittur farvegur. Breyting gerist ekki af sjálfu sér, hún verður til með ákvörðun.

Jafnrétti er ákvörðun.

Erla Ósk Ásgeirsdóttir
Formaður Jafnvægisvogarinnar