Ávarp formanns

Jafnvægisvog FKA var sett á laggirnar árið 2018 með það skýra markmið að stuðla að auknu jafnvægi kynja í efsta lagi stjórnunar í íslensku atvinnulífi. Verkefnið var frá upphafi hugsað sem hreyfiafl – ekki lagaskylda heldur hvati – byggt á þeirri einföldu staðreynd að jafnrétti gerist ekki af sjálfu sér. Það er afleiðing meðvitaðra ákvarðana, mælinga og gagnsæis.

Í samstarfi við Creditinfo, Deloitte, Dómsmálaráðuneytið, Háskóli Íslands, Pipar\TBWA, Ríkisútvarpið, Samtök fyrirtækja í sjávarútvegi og Sjóvá hefur verkefnið þróast í eitt sýnilegasta og áhrifamesta jafnréttisátak á sviði stjórnunar hér á landi. Ómetanlegt framlag forvera minna, styrktaraðila, Jafnvægisvogarráðs, verkefnastjórum og framkvæmdastjóra FKA síðustu ár er því að þakka - og síðast en ekki síst þátttakendur sem eru hið sanna hreyfiafl og vita að jafnrétti er ákvörðun.

2065 er ekki ásættanleg tímalína

Þrátt fyrir framfarir eru karlar enn um 75% nýráðninga í æðstu stjórnunarstöður. Með óbreyttri þróun næst 40/60 jafnvægi í framkvæmdastjórnum í fyrsta lagi árið 2065 samkvæmt spálíkani sem Dr. Ásta Dís Óladóttir setti fram árið 2025. Jafnrétti gerist ekki af sjálfu sér. Það þarf mælingar, gagnsæi og meðvitaða ákvörðun um að gera hlutina öðruvísi. Jafnvægisvogin er til þess að flýta þessari þróun og gera hana sýnilega.

Stefnumótandi tækifæri fyrir íslenskt atvinnulíf

Jafnvægisvogin er ekki einungis jafnréttisverkefni. Hún er stefnumótandi tækifæri fyrir íslenskt atvinnulíf. Rannsóknir sýna að fjölbreytt stjórnendateymi taka vandaðri ákvarðanir, bregðast hraðar við breytingum og skila betri langtímaárangri. Fyrirtæki sem leggja áherslu á jafnrétti laða að sér framsækið og metnaðarfullt starfsfólk og styrkja orðspor sitt gagnvart fjárfestum og samfélagi.

Þetta snýst ekki aðeins um réttlæti. Þetta snýst um gæði ákvarðana, ábyrga stjórnarhætti og samkeppnishæfni. Við vitum hvað þarf að gera. Spurningin er hvort við veljum að gera það. Jafnrétti þarf að vera hluti af kjarna stjórnarhátta fyrirtækja – ekki jaðarverkefni.

Jafnvægisvogin mælikvarði og hvati að breytingum

Jafnvægisvog FKA er mælitæki og hreyfiafl sem miðar að því að ná 40/60 kynjahlutfalli í efsta lagi stjórnunar íslenskra fyrirtækja. Verkefnið safnar gögnum, birtir árlegar mælingar og skapar vettvang fyrir fyrirtæki til að skuldbinda sig opinberlega til framfara.

Jafnvægisvogin byggir á gagnsæi, samanburði og ábyrgð – og hvetur fyrirtæki til að setja sér markmið, fylgja þeim eftir og gera árangur sýnilegan. Hún er þannig bæði mælikvarði og hvati að breytingum, sem stuðlar að sterkari stjórnarháttum, aukinni verðmætasköpun og fjölbreyttari forystu í íslensku atvinnulífi.

Ég bý yfir víðtækri reynslu af stefnumótun, umbreytingum og stjórnarstörfum. Ég er stjórnarformaður Festu - miðstöð um sjálfbærni og sit í stjórn Bláa lónsins og LeiðtogaAuðar. Í störfum mínum hef ég leitt umfangsmiklar breytingar þar sem menning, stefna og rekstur eru samþætt – með skýra áherslu á að tengja jafnrétti við kjarna stjórnarhátta og langtíma virðissköpun.

Ég er full tilhlökkunnar og markmiðið skýrt: að flýta þróuninni, dýpka samtalið og tryggja að jafnrétti verði óaðskiljanlegur hluti af stefnu og framkvæmd íslenskra fyrirtækja.

Þakkir til Ástu Dísar 

Ég tók við af Dr. Ástu Dís Óladóttur í febrúar 2026 enÁsta Dís hefur gegnt stöðu formanns Jafnvægisvogarráðs frá árinu 2022. Víðtæk reynsla og rannsóknir hennar, meðal annars innan Rannsóknaseturs um jafnrétti í efnahags- og atvinnulífi, hafa haft afgerandi jákvæð áhrif á faglega uppbyggingu og trúverðugleika verkefnisins. Reynsla af stjórnun og leiðtogastörfum innan háskólasamfélagsins og atvinnulífsins hafa einnig átt stóran þátt í að gera verkefnið öflugra sem aldrei fyrr. Undir hennar forystu hefur greining verið efld, samtal við atvinnulífið dýpkað og Jafnvægisvogin fest sig í sessi sem áhrifamikill vettvangur í íslensku atvinnulífi.

Þá verður spennandi að vinna með Jafnvægisvogarráði, styrktaraðilum verkefnisins, stjórn FKA, Andreu Róbertsdóttur framkvæmdastjóra FKA og öðrum sem að verkefninu koma. Í byrjun mars 2026 verður ráðin inn ný verkefnastýra Jafnvægisvogarinnar sem ég kem til með að vinna náið með af ástríðu og saman komum við til með að vinna að því að jafna hlut kynjanna - næg eru verkefnin.

Erla Ósk Ásgeirsdóttir
Formaður Jafnvægisvogarinnar