Fréttir
  • Vesturland_map

Stofnun FKA Vesturlands - fjórða landsbyggðanefnd FKA

12. apr. 2018

Stofnfundur FKA Vesturlands haldinn í Stykkishólmi 18.apríl

Stofnfundur FKA Vesturland, fer fram á Narfeyrarstofu í Stykkishólmi 18.apríl næstkomandi kl.20.00  

NarfeyrarstofaFKA Vesturland verður þar með fjórða landsbyggðardeild félagsins, en þegar eru starfræktar deildir á Suðurlandi, Norðurlandi og á Vestfjörðum. Í FKA eru ríflega 1.100 félagskonur úr öllum greinum atvinnulífsins. Félagið stendur fyrir ríflega 80 viðburðum á ári en kjarnastarfssemi þess felst í að efla tengsl kvenna. Þá er FKA öflugur málsvari kvenleiðtoga í atvinnulífinu og beitir sér sem slíkt í þágu kvenna. Á stofnfundinum í Stykkishólmi mun Rakel Sveinsdóttir, formaður FKA, halda erindi og kynna starfssemi félagsins og helstu verkefni. Undirbúningur fundarins hefur verið unnin með Steinunni Helgadóttur félagskonu og eins eiganda Narfeyrastofu í Stykkishólmi. Að beiðni formanns, mun Steinunn leiða starf Vesturlandsdeildarinnar fyrstu misserin.

Rakel Sveinsdóttir:
,,Það er mér mikið fagnaðarefni að FKA sé nú að hefja starfssemi sína á Vesturlandi, mínum æskuslóðum. Þar hafa konur löngum verið mjög öflugar í framvarðasveit atvinnu- og viðskiptalífs ólíkra atvinnugreina. Ég nefni sem dæmi sjávarútveg, verslun og þjónustu, landbúnað og ferðaþjónustu. Eitt einkenna Vesturlands er einmitt að þar er atvinnulífið ekki aðeins blómlegt, heldur í eðli sínu einnig mjög fjölbreytt. ”

Reglulegum fundum fyrir félagskonur er streymt á netinu, en eins standa landsbyggðardeildir fyrir sinni viðburðardagskrá yfir árið. Þá geta landsbyggðarkonur sótt alla viðburði, ráðstefnur eða námskeið sem haldin eru á vegum FKA í Reykjavík. Meðal hreyfiaflsverkefna sem FKA stendur nú fyrir er að fjölga konum í stjórnum félaga og stjórnendastörf, að auka ásýnd kvenna í fjölmiðlum,  að fylgja eftir #metoo byltingunni og standa fyrir fjölbreyttri fræðslu og fundum fyrir félagskonur. Konur á Vesturlandi eru hvattar til að fjölmenna á fundinn, en skilyrði aðildar að FKA, er að viðkomandi konur séu í stjórnenda- eða leiðtogahlutverki.

Vesturland_mapEkki þarf að skrá sig sérstaklega á fundinn, allar konur í atvinnulífinu á Vesturlandi velkomnar.  Nánari upplýsingar veita undirritaðar en hægt að sjá nánar um fundinn hér

https://www.facebook.com/events/2153310494955389/

Rakel Sveinsdóttir formaður FKA, gsm 822-0866
Steinunn Helgadóttir formaður FKA Vesturlands, gsm 841-2000

 

 





Þetta vefsvæði byggir á Eplica