Fréttir
  • Mynd-2-FKA

FKA Viðurkenningarhafar 2017

Þrjár athafnakonur og fyrirmyndir heiðraðar

24. jan. 2017


Mynd-1-FKA-vidurkenningarÞað ríkti sannkölluð hátíðarstemning í Silfurbergi í Hörpu þegar FKA afhenti sínar árlegu viðurkenningar að viðstöddum fjölda þeirra karla og kvenna sem standa í framlínu íslensks viðskipta- og atvinnulífs.  Lóa Þórhallsdóttir, formaður félagsins ávarpaði gesti og bauð þá velkomna en að því búnu afhenti Þórdís Kolbrún Reykfjörð Gylfadóttir þremur konum úr atvinnulífinu viðurkenningar félagsins.

FKA viðurkenninguna 2017 hlaut Guðrún Hafsteinsdóttir, einn eiganda og markaðsstjóri Kjöríss, formaður Samtaka iðnaðarins, varaformaður Samtaka atvinnulífsins. 

HÉR má sjá myndband af Guðrúnu unnið af FKA og SIGVA Media

Guðrún lauk námi í mann- og kynjafræði frá Háskóla Íslands, er mikill jafnréttissinni og hefur verið óþreytandi við að hvetja konur til að láta til sín taka á sem flestum sviðum þjóðlífsins. Sjálf hefur hún verið óhrædd við að stökkva út í djúpu laugina og taka að sér ábyrgðarmikil og krefjandi verkefni. Þann kjark þakkar hún ekki síst foreldrum sínum. „Þau höfðu óbilandi trú á okkur systkinunum og ég man ekki eftir að kyn hafi nokkurn tíman verið fyrirstaða í þeirra huga. Þau hafa verið okkur öllum ómetanlegar fyrirmyndir“ segir hún. 

Guðrún hefur langa og víðtæka reynslu af atvinnurekstri. Ekki aðeins hefur hún setið í stjórn fjölskyldufyrirtækisins Kjöríss frá unga aldri heldur tók hún við starfi framkvæmdastjóra félagsins aðeins 23 ára að aldri eftir fráfall föður síns og gegndi því í nokkur ár. Hún var síðar búsett í Þýskalandi í fimm ár en sneri aftur heim árið 2003, full af uppsafnaðri orku og athafnaþrá.  Guðrún var fyrst kjörin formaður Samtaka iðnaðarins á Iðnþingi 2014 – og hefur verið endurkjörin tvisvar eftir það. Árið 2015 var hún kjörin varaformaður Samtaka atvinnulífsins og 2016 tók hún við stjórnarformennsku í Lífeyrissjóði verzlunarmanna. Auk þess starfar hún sem markaðsstjóri Kjöríss.

Í rökstuðningi dómnefndar segir að Guðrún Hafsteinsdóttir hafi verið konum í atvinnulífinu sérstök hvatning og fyrirmynd bæði á sviði atvinnureksturs og með framlagi sínu í Samtökum Iðnaðarins, og Samtökum atvinnulífsins.

 

Hvatningarviðurkenningu FKA hlaut Dr. Hólmfríður Sveinsdóttir, framkvæmdastjóri Iceprotein ehf og Protis ehf. 

HÉR má sjá myndband af Hólmfríði unnið af FKA og Sigva Media

Hólmfríður lauk meistaranámi  frá Justus-Liebig Universität í Giessen í Þýskalandi  og doktorsprófi í lífvísindum og næringarfræði frá Háskóla íslands 2009. Hún er fædd og uppalin í Skagafirði og sneri þangað aftur að námi loknu þar sem hún stýrir nú tveimur frumkvöðla fyrirtækjum; rannsóknarfyrirtækinu Iceprotein og Protis íslensku líftæknifyrirtæki sem sérhæfir sig í þróun, framleiðslu og sölu á lífvirku fiskprótíni úr villtum íslenskum þorski. Þannig nýtir hún þekkingu sína, reynslu og kraft í að efla orku og lífsþrótt landsmanna. Hólmfríður er sannfærð um að Íslendingar eigi í auknum mæli eftir að nýta hreina og óspillta náttúru landsins til að framleiða matvæli.  „Við sitjum á hvílíkum heilsueflandi verðmætum – og eigum að framleiða miklu meira“ segir hún.

Í rökstuðningi dómnefndar segir m.a. að „Hólmfríður sé frumkvöðull þegar kemur að nýtingu afurða úr sjávarútvegi, sé aðili að fyrirmyndar samstarfi innan sveitarfélags á landsbyggðinni og milli háskóla- og rannsóknarstofnana með stuðningi atvinnulífsins.“

 

Þakkarviðurkenningu FKA 2017 hlaut Hafdís Árnadóttir, stofnandi og eigandi Kramhússins. 

HÉR má sjá myndband af Hafdísi unnið af FKA og SIGVA media 

Hafdís er fædd og uppalin á Hjalteyri í Eyjafirði, stundaði nám við íþróttaskólann á Laugarvatni áður en hún hélt utan til Danmerkur þar sem hún lagði stund á dans eða „rytmegymnastik“ í skóla Lis Burmeister. Eftir heimkomuna stofnaði hún leikfimiskóla sem kenndur var við hana og bauð m.a. upp á svokallaða „frúarleikfimi“. Árið 1972 var Hafdís fengin til að kenna líkamsbeitingu og líkamsþjálfun við nýstofnaðan Leiklistarskóla SÁL – og síðar við Leiklistarskóla Íslands þar sem hún kenndi þar til fyrir nokkrum árum.

Kramhúsið var stofnað 1984 og vakti strax athygli fyrir fjölbreytt og nýstárleg námskeið. Sjálf segist Hafdís líta á Kramhúsið sem nokkurs konar gróðurhús; þar hafi margt farið af stað; byrjað að spíra, þroskast og stækkað. Nægir þar að nefna Kvennakór Margrétar Pálmadóttur og Sirkus Ísland. En þó Hafdís segi velgengni Kramhússins fyrst og fremst fólkinu í kringum hana að þakka; viðskiptavinum, starfsfólki og stuðningsliði er flestum ljóst að ástríða hennar, dugnaður og víðsýni skipti sköpum í sögu Kramhússins. Í rökstuðningi dómnefndar segir m.a.: „Hafdís er brautryðjandi og hefur verið driffjöður í áratugi fyrir litríku lista- og menningarlífi. Hafdís hefur innleitt nýjungar, skapað alþjóðlegar tengingar og hefur stuðlað að fjölbreyttara samfélagi með lífsstarfi sínu. “

FKA skipar dómnefnd á hverju ári til að velja þær konur sem hljóta viðurkenningar félagsins hverju sinni.

Dómnefnd 2017:

Áshildur Bragadóttir, forstöðumaður Höfuðborgastofu
Grímur Sæmundsen, forstjóri Bláa Lónsins
Herdís Jónsdóttir eigandi og fjármálastjóri Happy Campers
Jakob Sigurðsson, forstjóri VÍS
Jónína Bjartmarz, framkvæmdastjóri Okkar Konur Kína ehf
Liv Bergþórsdóttir, forstjóri NOVA
Jón Diðrik Jónsson, framkvæmdastjóri Senu

FKA þakkar öllum þeim sem stóðu að hátíðinni með FKA og óskar viðurkenningarhöfum innilega til hamingju.






Þetta vefsvæði byggir á Eplica