Fréttir

FKA og RÚV starfa saman að viðmælendaþjálfun fyrir konur

RÚV og FKA hafa undirritað samstarf um verkefni sem ætlað er að auka fjölbreytni viðmælenda í íslenskum fjölmiðlum.

22. feb. 2019

FKA og RÚV starfa saman að viðmælendaþjálfun fyrir konur

2A7A5227

RÚV og FKA hafa undirritað samstarf um verkefni sem ætlað er að auka fjölbreytni viðmælenda í íslenskum fjölmiðlum. 

Framtakið felur í sér að FKA mun auglýsa eftir konum vítt og breitt úr samfélaginu sem áhuga hafa á þjálfun í að miðla sinni sérþekkingu í fjölmiðlaviðtölum. Árlega næstu þrjú árin verður svo haldið hagnýtt námskeið í húsakynnum RÚV þar sem þátttakendur fá leiðsögn og tækifæri til að spreyta sig sem viðmælendur við raunverulegar aðstæður í útvarpi og sjónvarpi. Nefnd FKA velur fjölbreyttan hóp kvenna til að taka þátt og leggur til reynda kennara til verksins.

Magnús Geir Þórðarson:

Jafnrétti er alger undirstaða í dagskrá og starfsemi RÚV. Frá upphafi árs 2016 hefur verið haldið nákvæmt kynjabókhald yfir dagskrá RÚV og við erum stolt af því að algert jafnvægi er á milli kynja í hópi viðmælenda í dagskrá RÚV. Á hinn bóginn er enn nokkuð í að jafnvægi náist meðal viðmælenda í fréttum þó bilið hafi minnkað hjá RÚV á undanförnum árum, það er nú 63% karlar og 37% konur. Og þó RÚV skeri sig frá flestum öðrum miðlum hérlendis og erlendis hvað þetta varðar þá viljum við halda áfram að gera betur,“ sagði Magnús Geir Þórðarson við það tækifæri.

RÚV hefur áður staðið fyrir ýmsum aðgerðum til að efla þátttöku kvenna í fjölmiðlum, m.a. námskeið í íþróttafréttamennsku fyrir konur, námskeið í spurningatækni fyrir Gettu betur. Verkefnið nú er að hluta byggt á breskri fyrirmynd frá BBC, breska ríkisútvarpinu, BBC Expert Women.

Rakel Sveinsdóttir:

„Fjölmiðlaverkefni FKA hefur staðið yfir frá 2013 og á þeim tíma höfum við séð mikla breytingu á viðhorfi og áhuga fjölmiðla að auka ásýnd kvenna sem viðmælendur í öllum málum. Þetta verkefni er frábært að því leyti að það gagnast ekki aðeins þeim konum sem taka þátt, heldur öllum fjölmiðlum og fjölmiðlaneytendum á Íslandi.“





Þetta vefsvæði byggir á Eplica