Fréttir
  • _D4M4937

FKA og Íslandsbanki undirrita áframhaldandi samstarf

9. feb. 2018

Íslandsbanki og Félag kvenna í atvinnulífinu (FKA) hafa undirritað nýjan samstarfssamning en bankinn hefur verið aðalstyrktaraðili félagsins frá árinu 2010. Samningurinn er til þriggja ára.

_D4M4937

Markmið samningsins er að stuðla að því að efla félagið og leggja áherslu á að miðla fjármálatengdri þekkingu og reynslu til félagskvenna í formi samvinnuverkefna, viðburða og fræðslu.

Rakel Sveinsdóttir, formaður FKA:

„Stuðningur Íslandsbanka hefur verið félaginu afar mikilvægur síðustu árin, enda hefur félagið eflst mjög hin síðustu ár og stendur nú sem eitt mikilvægasta hreyfiafl kvenna í atvinnulífinu á Íslandi. Meginmarkmið félagsins er að auka á hlutdeild kvenna í stjórnunarstöðum og þétta raðirnar okkar sem öflugt tengslanet. Þar hefur Íslandsbanki verið til fyrirmyndar í samstarfi, enda bankinn leiðandi í jafnréttismálum og þá ekki síst í því markmiði að réttur kynja í ráðningum og til starfsþróunar sé jafn. Áframhaldandi samstarf FKA við Íslandsbanka er því mikið fagnaðarefni og felur í sér stuðning við okkar starf í víðtækri merkingu.“

Birna Einarsdóttir, bankastjóri Íslandsbanka:

„Við höfum unnið markvisst að því að jafna hlut kynjanna hjá okkur í Íslandsbanka og uppskerum við í dag eftir því. Það er okkur mikilvægt að sýna gott fordæmi þegar kemur að jafnréttismálum enda skiptir það öll fyrirtæki máli að fleiri konur stýri peningum og sitji í stjórnunarstöðum á Íslandi. Farsælt og gott samstarf við FKA hefur verið okkur mikilvægt í þeirri vegferð.“ 

 

 





Þetta vefsvæði byggir á Eplica