Fréttir
  • Fkavidurkenningarhafar

FKA heiðrar þrjár konur í atvinnulífinu

31. jan. 2018


FkavidurkenningarhafarFKA- Félag kvenna í atvinnulífinu heiðraði  Ernu Gísladóttur, Hildi Petersen og Söndru Mjöll Jónsdóttur Buch fyrir eftirtektarverð störf þeirra í atvinnulífinu á árlegri hátíð sinni, sem haldin var í Gamla bíói. Erna Gísladóttir, sem er forstjóri bílaumboðsins BL ehf., hlaut FKA viðurkenninguna 2018. Hildur Petersen,  framkvæmdastjóri Vistvænnar framtíðar, fékk Þakkarviðurkenningu FKA og Sandra Mjöll Jónsdóttir Buch, framkvæmdastjóri Platome Líftækni, Hvatningarviðurkenningu FKA 2018. 

Konurklaeddustsvortu1Um fimm hundruð manns voru við afhendinguna, þar á meðal fjöldi kvenna og karla úr framlínu íslenskskts viðskipta- og atvinnulífs. Þetta er í nítjánda sinn sem hátíðin er haldin en ávarpi Rakelar Sveinsdóttur, formanni félagsins, kom fram að sjaldan hefði verið jafn áríðandi  og nú, að draga fram fyrirmyndir í atvinnulífinu. Ekki aðeins væri #metoo byltingin að kalla á miklar breytingar, heldur lifði hið ósýnilega glerþak enn góðu lífi sem ekki einu sinni lög Alþingis væru að ráða við.

Fka1Sigríður Andersen, dómsmálaráðherra, veitti viðurkenningarnar í fjarveru Þórdísar Kolbrúnar Reykfjörð Gylfadóttur, ferðamála-, iðnaðar- og nýsköpunar­ráðherra. 





StjornFKAÞá hafði stjórn FKA, hvatt allar konur í íslensku atvinnulífi til að klæðast svörtu í dag, til stuðnings #metoo byltingunni. Ákallinu var vel tekið og klæddust bæði karlar og konur svörtu víðs vegar í dag auk þess sem svarti liturinn undirstrikaði sterka samstöðu gesta á hátiðinni. Í ræðu formanns FKA kom fram að félagið taki það hlutverk sitt alvarlega að fylgja eftir #metoo byltingunni með ýmsum aðgerðum.

 

 

FKA viðurkenningin 2018 - Erna Gísladóttir

Fkavidurkenning.Ernagisladottir

FKA viðurkenninguna 2018 hlaut Erna Gísladóttir, forstjóri bílaumboðsins BL ehf. og einn af eigendum þess, stjórnarformaður Sjóvár-Almennra trygginga hf. og í stjórn Haga hf. Erna lauk B.Sc. í hagfræði frá Háskóla Íslands 1991 og MBA frá IESE í Barcelona á Spáni 2004. Erna er forstjóri BL ehf. sem er stærsta bílaumboð landsins með 12 bílaumboð og yfir 250 starfsmenn.

Erna hefur unnið meira og minna í bílgreininni allt sitt líf, byrjaði snemma að aðstoða á bílasýningum hjá Bifreiðum og landbúnaðarvélum og hefur gengið í flest störf hjá BL nema viðgerðir á bílum. Erna er stjórnarformaður Sjóvá-Almenntra trygginga hf. og hefur setið í stjórn tryggingafélagsins frá 2009. Þá hefur hún verið stjórnarmaður í Högum hf. frá árinu 2010.

Erna segir að helstu áskoranir í rekstri BL eins og hjá flestum íslenskum fyrirtækjum felist í því að leitast við að lesa í efnahagssveiflurnar og greina með hvaða hætti rekstrarumhverfið þróast. Erna telur lykilinn að góðum rekstri felast í frábæru samstarfsfólki og áætlanagerð. Áhugamál Ernu eru ferðalög á framandi slóðir, útivera, golf og laxveiði.

Í rökstuðningi dómnefndar segir meðal annars: „Erna hefur á undanförnum árum reist við gömlu bílaumboðin B&L og Ingvar Helgason í sameinuðu fyrirtæki BL. Hún hefur gert það með þeim hætti að BL er nú stærsta bifreiðaumboðið á Íslandi og hefur aukið markaðshlutdeild þess svo eftir er tekið.

Þakkarviðurkenning FKA 2018 - Hildur Petersen

Thakkarvidurkenning.hildurpetersen
Þakkarviðurkenningu FKA 2018 hlaut Hildur Petersen framkvæmdastjóri Vistvænnar framtíðar. Hildur hefur alla sína tíð unnið við fyrirtækjarekstur og átt sæti í stjórn margra fyrirtækja og félagasamtaka. Þar má nefna Pfaff, Kaffitár, FKA, ÁTVR, SPRON og EYESLAND.
Hildur varð framkvæmdastjóri ljósmyndavörufyrirtækisins Hans Petersen árið 1979, eingöngu 23 ára og enn við nám í viðskiptafræði við Háskóla Íslands. Fyrirtækið var stofnað af afa hennar Hans Petersen árið 1907 og þegar faðir hennar lést árið 1979 var henni falið að taka við stjórnartaumunum. Starfi framkvæmdastjóra Hans Petersen gegndi Hildur í rúma tvo áratugi eða allt til ársins 2000. Hún hafði brennandi áhuga á nýsköpun og framþróun og var Hans Petersen þekkt fyrir framsækna stjórnunarhætti þar sem þarfir viðskiptavina voru hafðir að leiðarljósi og vel hlúð að starfsfólki.  
 
Sem stjórnarformaður ÁTVR nýtti Hildur reynslu sína af nútíma stjórnunarháttum til að aðlaga þjónustu og ímynd einkasölunnar að tíðarandanum. Í dag rekur Hildur fyrirtækið Vistvæna framtíð en markmiðið með stofnun fyrirtækisins var að draga úr plastsóun.
 
Vistvæn framtíð býður nú upp á margnota og vistvænar vörur m.a. tengdar almennum innkaupum. Hildur fékk til sín þrjá unga myndlistamenn og rifhöfunda til að hanna nýstárlega vörulínu af innkaupapokum með mengunina í hafinu í brennidepli undir yfirskriftinni „Við mótum framtíðina“. Markmiðið er að þessir athyglisverðu innkaupapokar komi í stað plastpokanna og að fólk vilji nota þá aftur og aftur. Hildur hefur ástríðu fyrir því að lesa í markaðinn og aðlaga þjónustu og vöruframboð að þörfum viðskiptavina.

Í rökstuðningi dómnefndar segir meðal annars:  Hildur tók kornung við rekstri fjölskyldufyrirtækisins Hans Petersen og var um árabil ein þeirra fáu kvenna á Íslandi sem gegndi forstjórastarfi í stóru fyrirtæki. Hildur var áberandi í starfi sínu og tók að auki að sér ábyrgðarmikil hlutverk í íslensku viðskiptalífi og hefur því verið fyrirmynd margra sem á eftir henni komu.

 

Hvatningarviðurkenning FKA 2018 - Sandra Mjöll Jónsdóttir 

Hvatningarvidurkenning.sandramjollHvatningarviðurkenningu FKA 2018 hlaut Dr. Sandra Mjöll Jónsdóttir Buch frumkvöðull og framkvæmdastjóri Platome Líftækni. Sandra Mjöll hefur brennandi áhuga á nýsköpun og frumkvöðlastarfi. Hún hefur starfað við nýsköpun og vísindarannsóknir um árabil og þróað tækni þar sem ónýtanlegir blóðhlutar frá Blóðbankanum eru nýttir til að framleiða hágæða líftæknivörur. Í tengslum við þá tækni stofnaði hún sprotafyrirtækið Platome Líftækni. Sandra  hefur verið framkvæmdastjóri félagsins frá árinu 2016 sem hlaut titilinn sproti ársins hjá Viðskiptablaðinu 2017.

Sandra Mjöll lauk doktorsprófi í líf- og tæknivísindum frá Háskóla Íslands 2017, viðbótardiplóma í lífeindafræði frá Háskóla Íslands 2012 og B.Sc. í lífeindafræði frá Háskóla Íslands 2011. Frá 2014 hefur hún verið aðjúnkt við læknadeild Háskóla Íslands og haft með höndum skipulagningu, kennslu og umsjón með áföngum í mannerfðafræði ásamt vísinda- og teymisvinnu fyrir nemendur í lífeindafræði. Þá hefur hún setið í námsbrautarstjórn lífeindafræði og komið að stefnumótun námsbrautarinnar.

Á árunum 2013-2016 starfaði Sandra Mjöll sem sérfræðingur í líffræði stofnfruma og vefjaverkfræði við Háskólann í Reykjavík og annaðist vísindarannsóknir og leiðbeindi nemendum í rannsóknarnámi. Sandra Mjöll hefur á undanförnum árum unnið til fjölda verðlauna og viðurkenninga fyrir störf sín.

Í rökstuðningi dómnefndar segir meðal annars: Sandra hefur ásamt samstarfsfólki sínu byggt upp hátæknifyrirtæki, sem ef vel tekst til, stuðlar að framförum í læknavísindum. Fyrirtækið starfar á sviði sem er áhugavert og hefur raunhæfa vaxtamöguleika. Einkar áhugavert er að í vörum fyrirtækisins eru notaðar útrunnar blóðflögueiningar frá blóðbönkum sem annars yrði fargað.

FKA skipar dómnefnd á hverju ári til að velja þær konur sem hljóta viðurkenningar félagsins hverju sinni.

Dómnefnd 2018:

Danielle Neben, varaformaður FKA, stjórnarkona Meniga og eigandi Maresías  
Eva Magnúsdóttir, formaður LeiðtogaAuðar, eigandi og framkvæmdastjóri Podium
Finnur Árnason, forstjóri Haga
Orri Hauksson, forstjóri Símans
Margrét Kristmannsdóttir, fyrrum formaður FKA, eigandi og framkvæmdastjóri Pfaff
Rut Jónsdóttir, varaformaður Atvinnurekendadeildar, framkvæmdastjóri fjármálsviðs Íslenska Gámafélagsins 
Skúli Mogensen, forstjóri WOW

Stjórn FKA:

Formaður FKA: Rakel Sveinsdóttir, framkvæmdastjóri Spyr
Danielle Neben, stjórnarkona Meniga og eigandi Maresías  
Kolbrún Hrund Víðisdóttir, eigandi og stjórnarkona Svartækni
Áslaug Gunnlaugsdóttir, lögmaður og  eigandi LOCAL Lögmönnum
Anna Þóra Ísfold, sérfræðingur hjá Ísfold markaðsráðgjöf
Guðrún Ragnarsdóttir, ráðgjafi og meðeigandi ráðgjafafyrirtækisins Strategíu ehf., 
Ragnheiður Aradóttir, stofnandi og eigandi viðburðafyrirtækisins PROevents og þjálfunarfyrirtækisins PROcoaching

Framkvæmdastjóri FKA er Hrafnhildur Hafsteinsdóttir





Þetta vefsvæði byggir á Eplica