Fréttir

Fjölmiðladagur FKA

Staða kvenna í íslenskum fjölmiðlum snúið við

30. sep. 2017

Félag kvenna í atvinnulífinu, FKA, hvetur forsvarsmenn innlendra ljósvakamiðla til að snúa kynjahlutfalli viðmælenda sinna við þann 4. október næstkomandi á Fjölmiðladegi FKA, og endurtaka þar með leikinn frá því í fyrra. Þann dag voru konur 67% viðmælenda. Nú er stefnan sett á 80%. Jafnréttisráð Evrópuþingsins hefur óskað eftir upplýsingum um árangurinn, sem verður kynntur tveimur dögum síðar.

Rannsóknir sem Creditinfo hefur unnið í samstarfi við FKA undanfarin ár hafa sýnt fram á 80/20 annars vegar og hins vegar 70/30 hlutföll körlum í vil þegar kemur að fréttatengdu efni á ljósvakamiðlunum. Með því að snúa hlutfallinu við á innlendum miðlum þennan dag verður minnt á að ákjósanlegast sé að halli á hvorugt kynið frá degi til dags, allt árið um kring.

Félag kvenna í atvinnulífinu kynnir glænýjar niðurstöður Creditinfo þennan dag og stendur fyrir óformlegum morgunverðarfundi fyrir fjölmiðlafólk í húsakynnum Blaðamannafélagsins. Mary Hockaday, sem stýrir ritstjórnarstefnu BBC World Service English kemur til landsins og deilir sögum frá þrjátíu ára farsælum ferli sínum þar. Mary kemur að verkefninu Turn Up The Volume hjá BBC sem miðar að því að jafna hlut kynjanna í fjölmiðlum.

Ásamt erindi Mary Hockaday fer fulltrúi Creditinfo, yfir glænýjar tölur um kynjahlutfall viðmælenda í helstu ljósvakamiðlum landsins.

Morgunverðafundurinn verður hjá Blaðamannafélaginu Síðumúla 23, þann 4. október milli klukkan kl. 8.00-10.00. Dagskrá hefst 8.30 og þess ber að geta að Hockaday þiggur hvorki laun né gjafir vegna komu sinnar til landsins, eins og reglur BBC gera ráð fyrir.

  • Meira um Mary:

http://www.bbc.co.uk/corporate2/insidethebbc/managementstructure/biographies/hockaday_mary

Allar nánari upplýsingar um fjölmiðlaverkefni FKA veita:
Hrafnhildur Hafsteinsdóttir, framkvæmdastjóri FKA, í síma: 896 7566
Rakel Sveinsdóttir, stjórnarformaður FKA, í síma: 822 0866





Þetta vefsvæði byggir á Eplica