Fréttir
  • Fast50_RisingStar-6

Fast 50 & Rising Star

Samstarfsaðilar Deloitte í Rising Star og Fast 50 eru Samtök iðnaðarins, Nýsköpunarmiðstöð Íslands og Félag kvenna í atvinnulífinu.

13. nóv. 2017

RisingStar_sigurvegarar_med_domnefnd-og-SigurdiGuide to Iceland efst á Fast 50 lista Deloitte með rúmlega 30 þúsund% veltuaukningu

Listinn var kunngerður á uppskeruhátíð í gær

 Fyrirtækið Guide to Iceland ehf. varð efst á Fast 50 lista Deloitte sem kynntur var á viðburði í gær, sem gengur undir heitinu uppskeruhátíð íslenska tæknigeirans, en meginþáttur Fast 50 er að kortleggja þau tæknifyrirtæki sem vaxa hraðast með tilliti til veltuaukningar á hverju fjögurra ára tímabili.  Með Guide to Iceland voru á Fast 50 listanum þetta árið 15 önnur tæknifyrirtæki í fjölbreyttum atvinnugreinum og var meðaltalsvöxtur þeirra allra 2.149%.

Fast50_RisingStar-32Fast 50 listinn er alþjóðlegt verkefni sem miðar að því að skapa íslenskum tæknifyrirtækjum vettvang til að vekja athygli fjárfesta og annarra hagsmunaaðila vítt og breitt um heiminn á vexti og vaxtarmöguleikum sínum. Öll félögin á listanum eru jafnframt gjaldgeng á EMEA Fast 500 listann, sem er listi Deloitte yfir þau 500 tæknifyrirtæki í Evrópu, Mið-Austurlöndum og Afríku, sem eru að vaxa hvað hraðast. Listinn í ár verður kunngerður 7. desember næstkomandi í París.

Xiaochen Tian, framkvæmdastjóri Guide to Iceland segir það vera mikinn heiður að vera fulltrúi Íslands í þátttöku Deloitte Fast 500 í París og það sanni, enn á ný, að það er ekki stærðin sem skiptir máli, heldur gæðin og sú mikla vinna sem starfsfólk hefur lagt á sig. „Guide to Iceland er ennþá ungt fyrirtæki en tölurnar tala sínu máli og við höfum sannað vöxt okkar. Við leytumst ávallt við að setja markið hærra og vaxa enn frekar. Við höfum trú á okkur því að við stefnum ótrauð á frekari vöxt og ekkert mun stöðva okkur,“ segir Xiaochen.

GuideToIcelandGuide to Iceland verður í tilefni af þessu boðið á Slush ráðstefnuna í Helsinki, sem fer fram dagana 30. nóvember til 1. desember.

„Þetta er enn og aftur glæsilegur hópur fyrirtækja sem tekur þátt í Fast 50 og vonandi ná sem flest þeirra inn á EMEA Fast 500 listann og fá þá verðskuldaða athygli alþjóðlegra fjárfesta og sjóða. Við gerum ráð fyrir að Guide to Iceland raði sér þar ofarlega miðað við þennan stórglæsilega vöxt undanfarin ár. Alþjóðlegur listi eins og Deloitte EMEA Fast 500 fær mikla umfjöllun víðs vegar um heiminn og opnar á tækifæri þvert á landamæri. Það að íslenskt fyrirtæki skuli sýna svona hraðan vöxt á ekki lengra tímabili tel ég að eigi sér engin fordæmi hér á landi og eflaust langt í að við sjáum aftur viðlíka vöxt hér á landi,“ segir Sigurður Páll Hauksson, forstjóri Deloitte.

PlatomeAuk Fast 50 listans kynntu fimm svokölluð Rising Star fyrirtæki hugvit sitt á viðburðinum, en það voru Platome líftækni, SidekickHealth, Activity Stream, DTE og Kara Connect. Sérstök dómnefnd sérfræðinga valdi fyrirtækin DTE og Platome líftækni sem sigurvegara þetta árið.

Samkvæmt Söndru Mjöll Jónsdóttur-Buch, framkvæmdastjóra og meðstofnanda Platome er viðurkenningin vissulega mikil hvatning og styrkir þau í þeirri trú að Platome sé á réttri braut. 

DTE_winnerKarl Ágúst Matthíasson, meðstofnandi og framkvæmdastjóri DTE tekur í sama streng. „Við hjá DTE erum mjög stoltir af því að vera sigurvegarar Rising Star. Þetta er heilmikil viðurkenning fyrir það sem við höfum verið að gera og hvetur okkur áfram í átt að okkar markmiðum.“

Fara Platome og DTE með Guide to Iceland á Slush ráðstefnuna í Helsinki, í samfloti með sendinefnd Icelandic Startups.

Samstarfsaðilar Rising Star og Fast 50 eru Samtök iðnaðarins, Nýsköpunarmiðstöð Íslands og Félag kvenna í atvinnulífinu.

Sjá myndir





Þetta vefsvæði byggir á Eplica