Eftirfylgni styrkveitinga 2008

Öllum þeim er styrk hljóta ber að skila skýrslum vegna verkefna sinna og skiluðu styrkþegar ársins 2008 lokaskýrslum sínum um mánaðarmótin nóvember – desember 2009. Úr þessum skýrslum var unnin samantekt þar sem verkefni voru útlistuð og staða þeirra metin og má finna þessa samantekt á heimasíðunni.
Í henni kemur fram að á árinu 2008 voru 50 milljónum úthlutað til 56 styrkhafa.  50 konur nýttu styrk sinn en 6 ekki, af þeim voru þrjár sem ekki hófu verkefni sín en þrjár sem ekki skiluðu skýrslu.
Skýrslur sem þessar eru afar mikilvægar þar sem þar mat er lagt á verkefnin og árangur þeirra.  Mikilvægt er að meta árangur bæði fyrir styrkveitenda en ekki síður fyrir styrkhafann sem að þannig gerir sér betur grein fyrir nýtingu þess fjármagns sem veitt er hverju sinni.
Í skýrslu skal fylgja með kostnaðaryfirlit en kostnaður skal vera a.m.k. helmingi hærri en styrkupphæð.  Þó þarf ekki að skila kostnaðaryfirliti ef styrkur fékkst til gerðar viðskiptaáætlunar en í þeim tilfellum er nægilegt að skila áætluninni.

Heimasíða
Á heimasíðu verkefnisins www.atvinnumalkvenna.is  er hægt að sækja um styrki á rafrænan hátt auk þess sem síðan er vettvangur fyrir konur í atvinnurekstri.
Á síðunni eru birtar fréttir af verkefninu ásamt pistlum frá samstarfsaðilum sem eru Þekkingarmiðlun (pistlar um stjórnun ofl),  Jónu Björg Sætran (pistlar um persónulega hæfni ofl) Sirrý (framkoma ofl) og Guðrún Tryggvadóttir sem skrifar um umhverfismál.
Á síðunni er einnig hægt að nálgast upplýsingar um ýmislegt sem viðkemur rekstri, stefnumótun, markaðsmálum og fleiru. Einnig er verkefnið með facebook síðu þar sem hægt er að koma að stuttum fréttum og ábendingum.

Samstarf.

Í haust tók Atvinnumál kvenna þátt í Alþjóðlegu athafnavikunni sem haldin var í nóvember. Skipulagðir voru opnir hugmyndafundir víða um svæðið í samvinnu við Vinnumálastofnun á Norðurlandi vestra, SSNV Atvinnuþróun, Nýsköpunarmiðstöð, Byggðastofnun, Menningarráð Norðurlands vestra, Vaxtarsamning Norðurlands vestra og Virkja-Norðvesturkonur .  Fundirnir báru yfirskriftina „Kveikjum á perunni“ og voru haldnir á Sauðárkróki, Blönduósi og Hvammstanga.  Þar var unnið með hugmyndir að nýjum atvinnutækifærum en 50 manns sóttu fundina. Óformlegt samstarf hefur verið milli starfsmanns atvinnumála kvenna og Impru og atvinnuþróunarfélaga víða um land þar sem oft er verið að vísa viðskiptavinum áfram til viðkomandi aðila. 
Einnig var leitað eftir samstarfi við Impru um skipulagningu örnámskeiða fyrir konur.  Vonumst við til að hægt verði að bjóða slík námskeið næstkomandi haust.
Óhætt er að segja að samstarf aðila í stoðkerfinu skipti miklu máli þar sem verkefni skarast og viðskiptavinir eru oft á tíðum þeir sömu.

Reglur um styrkveitingar

Hægt er að sækja um styrk til að gera viðskiptaáætlun, til markaðs- og kynningarstarfs, til þróunarvinnu og hönnunar og vegna efniskostnaðar. Ennfremur geta konur sem hafa fullunna viðskiptaáætlun sótt um styrk á móti launakostnaði í ákveðinn tíma. Þetta gerir þeim kleift að vinna að stofnun fyrirtækisins og lágmarka tekjutap á þeim tíma. 
Til þess að eiga rétt á styrk þarf að uppfylla ákveðin skilyrði. Fyrirtækið eða verkefnið sem unnið er að verður að vera að lágmarki í 50% eigu konu eða kvenna, verkefnið þarf að fela í sér nýnæmi og það þarf að skapa atvinnu til lengri tíma. Þegar talað er um nýnæmi er ekki aðeins verið að tala um nýja vöru heldur einnig þróun á vöru eða þjónustu sem þegar er fyrir hendi.  

Ráðgjöf og aðstoð

Eitt af markmiðum með ráðningu starfsmanns í verkefnið var að sinna ráðgjöf og eftirfylgni við umsækjendur. Fjölmargar konur hafa haft samband við starfsmann,  umsækjendur um styrki, styrkhafar og  aðrar konur.  Aðstoðin er oftast fólgin í því að veita almennar leiðbeiningar og upplýsingar en einnig um næstu skref við þau verkefni sem unnið er að. 

Ennfremur er leitað til starfsmanns varðandi skýrslugerð við uppgjör styrkja og varðandi gerð umsóknar. Fyrirhugað er að setja inn á vefinn upplýsingar um gerð lokaskýrslna en á vefnum eru upplýsingar um gerð umsókna.

Ýmis verkefni
Brautargengisnámskeið, sem haldin eru á vegum Nýsköpunarmiðstöðvar, eru haldin víða um land. Eitt slíkt var haldið á Sauðárkróki vorið 2009 og hélt starfsmaður verkefnisins fyrirlestur um Atvinnumál kvenna og styrkmöguleika.

Einnig var fluttur fyrirlestur um sama efni fyrir þátttakendur í námskeiði Impru og Útflutningsráðs fyrir konur sem huga á útflutning „Konur í útrásarhug“.

Leitað var til ráðgjafa vegna hugmynda um stofnun tengslanets kvenna á Norðurlandi vestra en fjármagn til þess fékkst í Vaxtarsamningi Norðurlands vestra.  Starfsmaður tók þátt í undirbúningnum og var tengslanetið stofnað þann 19.júní og hefur hlotið nafnið Virkja Norðvesturkonur.

Póstlisti

Á póstlista verkefnisins eru nú um 600 manns og voru tvö rafræn fréttabréf send út á árinu í júní og desember.
Fréttabréfin er hægt að nálgast á heimasíðunni og hægt að skrá sig á póstlista á forsíðu hennar.

Þarfagreining

Síðastliðið sumar var ákveðið að gera könnun og þarfagreiningu meðal þeirra kvenna sem fengu styrk frá Atvinnumálum kvenna á árunum 2006-2009. Tilgangurinn var tvíþættur, annars vegar að kanna það hvernig styrkur til þeirra hafði nýst og hinsvegar til að kanna þörf á fræðslu og ráðgjöf í því skyni að þróa enn fremur þjónustu Atvinnumála kvenna.

Könnunin var gerð með rafrænum hætti dagana 19.ágúst til 6.september og send út með tölvupósti.
Hún var send á þær konur sem fengu styrki frá Atvinnumálum kvenna 2006-2009 og var heildarfjöldi (n) 191. Svör bárust frá 98 konum og var því svarhlutfallið 51%.

Hér að neðan gefur að líta helstu niðurstöður þarfagreiningarinnar.

Nýting á styrk

Þegar aldursdreifing svara er skoðuð kemur í ljós að tæplega 70% þeirra sem svara er á aldrinum 31-50 ára og helmingur svarenda voru styrkhafar árið 2008.  Tæplega helmingur svarenda er frá höfuðborgarsvæðinu en 17% frá Norðurlandi eystra en lægra hlutfall frá öðrum svæðum á landinu. Þegar spurt var um hvernig styrkur hafði nýst svöruðu 88% að hann hefði nýst mjög vel eða vel og sama hlutfall svarenda sögðust ætla að vinna áfram í viðskiptahugmynd/fyrirtæki sínum.

Fræðsla

Svarendur voru mjög áhugasamar um að fá fræðslu sem tengist viðskiptahugmynd þeirra eða rekstri en 77% svarenda vildu fá aukna fræðslu.  Þar ber hæst þörf á fræðslu um fjármál (64%) og markaðsmál (59%) en fast á eftir fylgja gerð viðskiptaáætlana, samningatækni, vöruþróun og bókhald en þriðjungur kvennanna nefndu þessa þætti.  Það má því álykta að mikil þörf sé á hagnýtri fræðslu í þessum efnisþáttum.
62% kvenna  töldu að staðbundin námskeið henti þeim best en fast á eftir fylgja netnámskeið en 49% kvenna nefna þau.   Stuttar kynningar virtust líka höfða til hópsins sem kemur einnig fram í næstu spurningu þar sem spurt var um lengd námskeiða en 78% vildu stutt og hnitmiðuð námskeið og 47% örnámskeið. 
Athygli vekur hve mikil þörf er á fræðslu af ýmsu tagi og þá sérstaklega fræðslu um fjármál. Ennfremur má  álykta sem svo að persónuleg nálgun höfði fremur til kvennanna og að þær vilji nýta tíma sinn vel þar sem þær vilja síst löng námskeið eða  langt nám. 

Ráðgjöf

Þegar spurt var um ráðgjöf þá sögðust 81% kvenna hafa fengið ráðgjöf af einhverju tagi. Flestar höfðu fengið ráðgjöf hjá Impru eða 67% ( helmingur svarenda er á höfuðborgarsvæðinu) en um fjórðungur hjá ráðgjöfum atvinnuþróunarfélaga eða annara.
79% vildu nýta sér áframhaldandi ráðgjöf af ýmsu tagi og það sem var helst nefnt er persónuleg handleiðsla eða markþjálfun en 63% svarenda nefndu þann kost.   Þar á eftir kom Impra og AMK með um helming svarenda. Ennfremur er mikil þörf á almennri rekstrar og viðskiptaráðgjöf en 42% nefna þann kost.
Athygli vekur að fjórðungur kvennanna sögðust hafa nýtt sér annarskonar ráðgjöf og nefndu í því sambandi vini, ættingja, maka eða aðra í svipaðri stöðu/svipuðum rekstri.
Hér má álykta sem svo að þrátt fyrir að meirihluti kvenna hafi fengið ráðgjöf þá er þörf fyrir enn frekari ráðgjöf. Ennfremur er athyglisvert hve margar konur nefna markþjálfun/handleiðslu sem gefur til kynna að persónuleg nálgun sé það sem henti þessum hóp best.

Hvað varðar opnar spurningar þá var spurt að því hvað styrkveitingin þýddi fyrir viðkomandi. Í langflestum tilfellum var viðurkenning og hvatning nefnd og síðan að án styrks hefði verkefni ekki farið af stað. Einnig nefndu margar konur að með styrknum hefði verið hægt að kaupa ýmsa þjónustu sérfræðinga.

Þær sem að töldu styrkinn ekki hafa nýst vel nefndu það helst að upphæðin var of lág og það vantaði fjármagn á móti en oft var einnig um persónulega hluti að ræða s.s. veikindi og aðrar utanaðkomandi aðstæður.

Ráðstefnur og fundir

Starfsmaður sat Jafnréttisþing  á vegum Félags- og tryggingamálaráðuneytis og Jafnréttisstofu þann 16.febrúar og námsstefna um vinnumarkaðssúrræði var sótt í apríl.
9. og 10. nóvember sótti starfsmaður ráðstefnu á vegum Félags- og tryggingamálaráðuneytis um atvinnumál og bar ráðstefnan yfirskriftina „Atvinna fyrir alla“.

Starfið framundan

Auk daglegrar umsýslu og símsvörunar eru verkefnin framundan af ýmsum toga.
Þar ber fyrst að nefna eftirfylgni vegna styrkveitinga ársins 2009 en um þessar mundir eru styrkhafar að skila skýrslum um verkefni sín. Þarf því að fara yfir skýrslur og ganga frá lokagreiðslum ásamt því að útbúa samantekt vegna styrkveitinga síðasta árs.
Samkvæmt þarfagreiningunni sem gerð var í fyrra er mikill áhugi hjá konum á styttri námskeiðum. Hefur starfsmaður verið í samvinnu við Nýsköpunarmiðstöð um málið þar sem þar er verið að þróa ýmiskonar örnámskeið. Fyrirhugað er að gefa konum kost á því að sækja slík námskeið sem vonandi verða í boði á haustönn.
Ennfremur lýstu konur miklum áhuga á markþjálfun og handleiðslu og munu leiðir til að þróa það áfram verða skoðaðar.
Tengslanet kvenna eru mikilvæg og skipta miklu máli fyrir konur. Spennandi verkefni er að þróa tengslanet kvenna á netinu og vinna að því að koma konum í samband við hvor aðra með samvinnu og samstarf í huga.
Samstarf milli stuðningskerfis atvinnulífsins er mikilvægt og verður áfram unnið að samstarfsverkefnum á því sviði eins og þörf krefur.
Starfsmaður hefur verið að vinna að tillögum um endurskoðun Lánatryggingasjóðs kvenna fyrir eigendur sjóðsins og munu þær liggja fyrir nú í lok júní.

Sauðárkróki 16.júní 2010

Ásdís Guðmundsdóttir